የማዕከላዊ ስታቲስቲክስ ኤጀንሲ በየወሩ የሚያወጣው የዋጋ ግሽበት ሁኔታ መረጃ በህዳር ወር 2012 ዓ.ም የተመዘገበው አጠቃላይ የዋጋ ግሽበት ካለፈው ዓመት ተመሳሳይ ወር ጋር ሲነፃፀር በ20.8 ከመቶ ከፍ ብሎ ታይቷል፡፡

የዋጋ ግሽበት ሁኔታ ካለፈው ዓመት ተመሳሳይ ወር ጋር በማነፃፀር የሚገኘው ውጤት ወቅታዊ የዋጋ ግሽበት ሁኔታን የሚያሳይ ሲሆን ከዚህም ውስጥ  የምግብ ዋጋ ግሽበት የህዳር ወር 2ዐ12 ዓ.ም ካለፈው ዓመት ተመሳሳይ ወር ጋር ሲነፃፀር በ24.5 በመቶ ጭማሪ አሳይቷል፡፡ዋና ዋና የእህል ዓይነቶች (በተለይ ጤፍ፣ ገብስ፣ ማሽላ፣ እንጀራ) እና የበሬ ስጋ የተጋነነ ባይሆንም የዋጋ ጭማሪው በዚህም ወር እንደ ቀጠለ ነው፡፡ ሆኖም ስንዴና በቆሎ በአንዳንድ ክልሎች መጠነኛ ቅናሽ አሳይተዋል፡፡ በተጨማሪም አንዳንድ የምግብ ዓይነቶች በተለይም የስንዴ ዳቦ፣ቲማቲም፣ቀይ ሽንኩርት፣ ነጭ ሽንኩርት፣ ድንች፣ ጎመን፣ ካሮት፣ ምስር፣ ቅቤ፣ የምግብ ዘይት እና ወተት አይብና ዕንቁላል ቅናሽ አሳይተዋል፡፡ ይሁን እንጂ ያለፈው ዓመት ተመሳሳይ ወር ዋጋ  ከአሁኑ ዓመት ተመሳሳይ ወር ጋር በንጽጽር ዝቅተኛ ስለነበር የዋጋ ግሽበቱ በያዝነው ወር ከፍ ብሏል፡፡

 በሌላ በኩል ምግብ ነክ ያልሆኑ የኢንዴክሱ ክፍሎች የዋጋ ግሽበት የህዳር ወር 2ዐ12 ዓ.ም ካለፈው ዓመት ህዳር ወር 2ዐ11 ዓ/ም ጋር ሲነፃፀርም የ16.4 በመቶ ጭማሪ አሳይቷል፡፡ ካለፉት ጥቂት ወራት ጀምሮ ምግብ ነክ ያልሆኑ የኢንዴክሱ ክፍሎች የዋጋ ግሽበት በተከታታይ ጭማሪ እያሳየ ነው፡፡ ከምግብ ነክ ያልሆኑ የኢንዴክሱ ክፍሎች የዋጋ ግሽበት ካለፈው ተመሳሳይ ወቅት ጋር ሲነፃፀር ከፍ እንዲል ካደረጉት ዋና ምክንያቶች ውስጥ በተለይ ልብስና መጫሚያ፣ የቤት ኪራይ፣ የቤት እንክብካቤና ኢነርጅ (ማገዶና ከሰል)፣ የቤት ዕቃዎችና የቤት ማስጌጫዎች፣ የቤት መስሪያ እቃዎች፣ ህክምና እና ትራንስፖርት (በተለይ የቤት መኪና) ላይ የታየው የዋጋ ጭማሪ ነው፡፡

በአጠቃላይ የህዳር ወር 2ዐ12 ዓ/ም አጠቃላይ የዋጋ ግሽበት ካለፈው ወር ጋር ሲነፃፀር በ0.6 ከመቶ ጭማሪ አሳይቷል፡፡

የዘድሮው ከአምናው ተመሳሳይ ወራት የሸማቾች ዋጋ ኢንዴክስ ለውጥ ንጽጽር በአገር አቀፍ ደረጃ