የማዕከላዊ ስታቲስቲክስ ኤጀንሲ በየወሩ የሚያወጣው የዋጋ ግሽበት ሁኔታ መረጃ በታህሳስ ወር 2012 ዓ.ም የተመዘገበው አጠቃላይ የዋጋ ግሽበት ካለፈው ዓመት ተመሳሳይ ወር ጋር ሲነፃፀር በ19.5 ከመቶ ከፍ ብሎ ታይቷል፡፡ 

የዋጋ ግሽበት ሁኔታ ካለፈው ዓመት ተመሳሳይ ወር ጋር በማነፃፀር የሚገኘው ውጤት ወቅታዊ የዋጋ ግሽበት ሁኔታን የሚያሳይ ሲሆን ከዚህም ውስጥ የምግብ ዋጋ ግሽበት የታህሳስ ወር 2ዐ12 ዓ.ም ካለፈው ዓመት ተመሳሳይ ወር ጋር ሲነፃፀር በ22.7  በመቶ ጭማሪ አሳይቷ፡፡በያዝነውም ወር አብዛኛዎቹ የእህል ዓይነቶች (በተለይ ሩዝ፣ ጤፍ፣ ስንዴ፣ በቆሎ፣ ገብስ እና ማሽላ) ዋጋ ካለፈው ወር ጋር ሲነጻጸር መጠነኛ ቅናሽ ታይቷል፡፡ የስጋ ዋጋ ጭማሪው ግን እንደ ቀጠለ ነው፡፡ በተጨማሪም አንዳንድ የምግብ ዓይነቶች በተለይም ቲማቲም፣ቀይ ሽንኩርት፣ ነጭ ሽንኩርት፣ ጎመን፣ ካሮት፣ ቅቤ፣ የምግብ ዘይት እና ወተት አይብና ዕንቁላል ቅናሽ አሳይተዋል፡፡ ይሁን እንጂ ያለፈው ዓመት ተመሳሳይ ወር ዋጋ ከአሁኑ ዓመት ተመሳሳይ ወር ጋር በንጽጽር ዝቅተኛ ስለነበር የዋጋ ግሽበቱ በያዝነው ወር ከፍ ብሏል፡፡  

በሌላ በኩል ምግብ ነክ ያልሆኑ የኢንዴክሱ ክፍሎች የዋጋ ግሽበት የታህሳስ ወር 2ዐ12 ዓ.ም ካለፈው ዓመት ተመሳሳይ ወር ጋር ሲነፃፀርም የ15.8 በመቶ ጭማሪ አሳይቷል፡፡ ካለፉት ጥቂት ወራት ጀምሮ ምግብ ነክ ያልሆኑ የኢንዴክሱ ክፍሎች የዋጋ ግሽበት በተከታታይ ጭማሪ እያሳየ ነው፡፡ ከምግብ ነክ ያልሆኑ የኢንዴክሱ ክፍሎች የዋጋ ግሽበት ካለፈው ተመሳሳይ ወቅት ጋር ሲነፃፀር ከፍ እንዲል ካደረጉት ዋና ምክንያቶች ውስጥ በተለይ ልብስና መጫሚያ፣ የቤት ኪራይ፣ የቤት እንክብካቤና ኢነርጅ (ማገዶና ከሰል)፣ የቤት ዕቃዎችና የቤት ማስጌጫዎች፣ የቤት መስሪያ እቃዎች፣ ህክምና እና ትራንስፖርት በተለይም የቤት መኪና ላይ የታየው የዋጋ ጭማሪ ነው፡፡ በአጠቃላይ የታህሳስ ወር 2ዐ12 ዓ.ም አጠቃላይ የዋጋ ግሽበት ካለፈው ወር ጋር ሲነፃፀር በ0.6 ከመቶ ጭማሪ አሳይቷል፡፡ 

የዘንድሮው ከአምናው ተመሳሳይ ወራት የሸማቾች ዋጋ ኢንዴክስ ለውጥ ንጽጽር በአገር አቀፍ ደረጃ